Білім берудің қазіргі цифрлық трансформациясы оқу үдерісінде цифрлық технологияларды тиімді пайдалана алатын педагог кадрлардың кәсіби даярлығын жетілдіру қажеттілігін айқындайды. Бұл мәселе болашақ биология мұғалімдерін даярлау барысында ерекше өзекті болып табылады, өйткені биологиялық білім беру мазмұны визуализацияны, интерактивті ресурстарды, виртуалды зертханаларды, цифрлық модельдеуді, онлайн-платформаларды және заманауи коммуникация құралдарын белсенді қолдануды көздейді. Зерттеудің мақсаты – жаппай ашық онлайн курс арқылы болашақ биология мұғалімдерінің цифрлық құзыреттерін қалыптастыру әдістемесін ғылыми-теориялық тұрғыдан негіздеу және эксперименттік тұрғыдан тексеру. Зерттеу аясында «Биологияны оқыту әдістері мен технологиялары» атты жаппай ашық онлайн курс әзірленіп, білім беру үдерісіне енгізілді және Stepik платформасында орналастырылды. Эксперименттік жұмыс Абай атындағы Қазақ ұлттық педагогикалық университетінде жүргізіліп, анықтаушы, қалыптастырушы және бақылау кезеңдерін қамтыды. Зерттеуге 6В01513 «Биология» білім беру бағдарламасының 4-курсындағы 100 студент қатысты. Диагностикалау Javier Touron әзірлеген 54 сұрақтан және Лайкерттің жеті балдық шкаласынан тұратын TDC (Teachers' Digital Competencies) сауалнамасы арқылы жүзеге асырылды. Цифрлық құзыреттіліктің бес компоненті бағаланды: ақпараттық сауаттылық және деректермен жұмыс; коммуникация және ынтымақтастық; цифрлық материалдарды жасау; құқықтық қауіпсіздік; проблемаларды шешу. Статистикалық өңдеу SPSS 26.0 бағдарламасында параметрлік емес Уилкоксон критерийін қолдану арқылы жүргізілді. Нәтижелер зерттелген барлық компоненттер бойынша статистикалық тұрғыдан маңызды өзгерістердің болғанын көрсетті. Ең жоғары оң динамика цифрлық материалдарды жасау, проблемаларды шешу, коммуникация және ынтымақтастық салаларында анықталды. Алынған нәтижелер жаппай ашық онлайн курсты болашақ биология мұғалімдерінің цифрлық құзыреттерін мақсатты түрде қалыптастыру құралы ретінде пайдалануға болатынын көрсетеді.